曼联冇电半和收货

李城哀兵唔敢乱搏
　　英超前列大战，2哥曼联主场恶斗第4位嘅李斯特城，「红魔鬼」曼联嚟到地狱赛程第3站，经过早前「四日两战」后，班波唔只攰爆，队长哈利马古尼上场勇战受伤，今场难免会避重就轻减慢行军速度。另边厢，李斯特城刚经历大败，预料亦唔敢冒进，半场和好路。

　　早前「双红会」赛前遇上球迷示威，搞到曼联对利物浦呢场大战，需要改期至香港时间5月14日凌晨举行，变相令红魔陷入「地狱赛程」，由欧霸盃4强次回合作客罗马，去到补赛主场对利物浦，曼联需于7日内踢4场比赛，令球员疲于奔命。

　　「地狱赛程」7日踢4场
　　因此，领队苏斯克查除咗需要考虑轮换人脚之外，球员上阵时亦会留前斗后，以免体力后劲不继，所以预料曼联上半场会拖慢比赛节奏。事实上，曼联喺英超争标机会淼茫，韦斯咸周一凌晨输波，红魔鬼亦稳入前4，唔会急于求胜，从佢哋近4场联赛主场有3场上半场打和就可见一斑，加上球队现时最大目标放喺欧霸盃决赛，或会留有一手，以免再有球员受伤，影响争标部署。

　　至于李斯特城要为力保联赛前4位而战，但佢哋上场2比4不敌下游球队纽卡素，期间一度落后4球，防线出现多次犯错，今场遇上实力更强嘅曼联，相信会打醒十二分精神，先做好防守，避免重蹈上场输波覆辙，预料双方上半场会以拉锯为主，同埋两队近3次交锋，上半场都打和，半场和值博。