今晚欧国盃出现第一个高潮！16强大战，比利时同葡萄牙喺中立场西班牙塞维利亚决战。比利时係「世界1哥」，葡萄牙就係衞冕之师，不过前者气势压一，近4场全胜，包括欧国盃分组赛3战赢晒，赢得嚟仲好似未出力咁款；葡萄牙搣唔甩「C朗球队」标籤，遇劲旅德国同法国都赢唔到，今场面对比利时，恐怕再难靠C朗一人之力取得晋级，平手盘捧比利时坐和望赢。
欧洲红魔未出真功夫
「欧洲红魔」比利时分组赛3战全胜，而且赢波过程清风送爽，完全感受唔到有任何压力；奇云迪布尼、夏萨特同韦素等主将都唔係踢足全场，领队马天尼斯明显留有一手，等淘汰赛阶段先全力争胜。
射手卢卡古今年长期处于勇态，现时已经射入3球，喺佢后面仲有奇云迪布尼同夏萨特，呢两名世界级中场造波畀队友又得，自己入波又得，而且梅尼亚及泰利文斯可以后上支援，大门由泰拔高图尔斯把守，三线平均实力都比葡萄牙优胜。
葡萄牙遇强冇晒符
葡萄牙喺分组赛最后一轮靠C朗射入两球，逼和法国2比2出线，呢名球星虽然射入5球领先神射手榜，但当中3球嚟自12码。呢个情况亦同时证明，葡萄牙领队费兰度山齐士一成不变，咁多年採用嘅战术都係围绕C朗，即使葡军现时拥有贝拿度施华同迪亚高祖达等高质球员，亦只能担当配角，上场斗法国，更将般奴费南迪斯放喺后备席，预计呢位曼联人气球星今场都係冇得踢正选。
葡军面对劲旅成绩一般，分组赛3战1胜1和1负，除咗逼和法国，对德国更大败2比4，只能击败匈牙利，气势完全畀3战全胜嘅比利时压落去。「欧洲红魔」实力比德国同法国更完整，而且踢法更具侵略性，呢场「让球盘」比利时唔使让波真係抵到烂，平手盘撑硬比利时。
发表评论