世盃外：法国斗波斯尼亚献细

今晚世盃外欧洲区D组焦点战，由法国主场迎战波斯尼亚。法国拥有基利安麦巴比、基沙文及保罗普巴等顶级球星，实力赢几条街，不过佢哋向来不擅强攻，尤其对住刻意死守嘅球队，总係老鼠拉龟冇碇埋手；波斯尼亚自知质态唔及对手，必定摆铁桶阵博偷鸡，今仗唔慌多波入，2.5球嘅入球细有分头值博。

　　上届世盃盟主法国，以大热姿态出战今夏欧国盃，点知16强止步，球王接班人基利安麦巴比4战全部食白果，令人失望。「高卢鸡」虽然实力强劲，但主帅迪甘斯爱用稳守突击战术，藉此发挥基沙文同麦巴比嘅速度优势，冇错对住强队或者搵到着数，但佢嘅战术太单调唔识变通，每当遇上主守球队，明显唔够进攻板斧，欠缺破密集嘅能力。法国暂时3场世盃外取得2胜1和，不过只係入得4粒，火力麻麻，今次唔知係因为内讧定其他原因，回勇嘅「银河唯一」基奥特居然冇入选，宾施马亦唔算係柱趸型箭头，少咗高波呢瓣，要破铁桶更加唔易。

　　波斯尼亚攻力极疲弱

　　波斯尼亚仍由老将迪斯高及比真历担大旗，喺阿仙奴已沦为边缘人嘅后卫哥拉辛拿斯仍然入选，而阵中竟然有10多名球员，代表国家队上阵次数只有单位数字，真係「老嘅太老、嫩嘅太嫩」，可见青黄不接问题之严重。而且佢哋状态亦曳爆，连同热身赛在内，近5场只得3和2负，包括头两轮世盃外仅得1和1负，其中有4仗冇波入，就算对住哥斯达黎加、黑山都交白卷，攻力极度疲弱，今仗面对顶级强队，冇得唔死守。

　　翻查纪录两军近3次交手，合共只制造5个入波，全开2球或以下，包括4月世盃外碰头法国作客小胜1比0，预计今仗佢哋亦会陷于苦战，球迷想睇入球骚可能会失望，2.5球嘅入球细有逾2倍咁好分头，梗係要支持。