曼联半和顶住仙

今晚英超重头戏梗係「魔仙战」，曼联喺主场硬撼阿仙奴。虽然红魔啱啱欧联大胜，但联赛主场仲未开斋，箭头安东尼马迪尔仍要继续坐波监，削弱前线火力，阿仙奴联赛2连败，今仗客场出击亦唔敢轻举妄动，相信初段大家都会先求唔输，半场和值得捧场。

　　曼联喺上周中欧联以5比0大胜RB莱比锡，令人喜出望外，但佢哋今季作客战绩更胜主场，各项赛事客场5连胜，反观主场就坚飘忽，欧联大胜之前，单计联赛3场主场只得1和2负，包括对热刺惨败1比6，嗰场仲有箭头安东尼马迪尔「直红」被逐，今场继续坐波监，令欧联连中三元嘅拍档拉舒福特要孤军作战，冇咗马迪尔帮手开路，「福仔」未必有上场咁醒神。

　　阿仙奴前线脚风欠佳

　　另一边厢，阿仙奴亦唔好得几多，虽然上周中欧霸轻取邓达克3蛋，不过只係对手太弱，佢哋近2场联赛输晒兼1球不入，主帅阿迪达的确令防守更有纪律性，但进攻未见改善，尤其上场联赛主场迎战李斯特城，儘管製造唔少攻门，可惜奥巴美扬、拿卡锡迪、布卡约沙卡先后失机，脚风明显唔顺，最终仲畀对手一次偷袭得手输0比1，今季面对利物浦、曼城同李城等强队都输波，造访曼联随时未踢先怯。

　　除此之外，阿仙奴今场有防线重心大衞雷斯因伤上阵成疑，焗用「炸弹」梅斯达菲都咪话唔惊，加上刚战罢欧霸赛事，比曼联少1日休息体力输蚀，预料会先做好防守唔敢乱攻。睇番曼联近4场联赛3次开半场和，阿仙奴近期上半场又经常交白卷，大家都咁保守，今仗初段唔排除陷于胶着，半场和值得追多铺。