德国撼捷克演入球骚

用新仔防线更危

　　今晚热身赛德国主场对捷克，德军领队勒夫讲明会收起8位主将，改用新人试阵，不宜高估，特别係「日耳曼兵团」防线无复以往稳阵；捷克拥有利华古逊射手柏德列舒希克，熟晒德军路数，有机会入到波。加上双方近6次交锋，总入球都达3球或以上，今晚等睇入球骚。

　　勒夫讲明畀主力抖

　　勒夫近年积极为德军进行换血，今仗赛前讲明包括门将纽亚、中场哥列斯卡、却奥斯、前锋迪姆华拿等8位主力都唔会上阵，留待之后2场欧国联对乌克兰及西班牙先派佢哋披甲。预料宾菲加前锋禾特舒密特、慕逊加柏中场科利安尼奥侯斯及庄拿斯荷夫曼等边缘国脚，有望担正。呢班二线兵为争上位，相信会积极抢攻，问题係德国防线冇以前咁稳，近3场就失咗7球，今仗难保清白之身。

　　捷克整体实力唔及德国，近6次对赛2胜4负，当中5次入到波，叫做唔係一面倒捱打。难得今场面对「德国B队」，大大增加入波机会。德国上月主场对土耳其同瑞士都激和3比3，今场再出现大手交易唔奇。