乌拉圭撼巴西激演入球骚

卡云尼有货交锋力可靠
　　世盃南美洲区外围赛，乌拉圭主场迎战榜首「1哥」巴西。两队状态都唔错，尤其乌拉圭重召卡云尼，呢名曼联前锋即刻交到货，上场入波助球队大捷，乘勇可再同苏亚雷斯搵入波；巴西前线人材鼎盛，冇尼马都唔怕，预料双方力求3分都会抢攻，捧2.5球入球大。（周三早上7时开赛）

　　主场出击嘅乌拉圭，今轮国际赛重召曼联前锋卡云尼，呢位老牌射手上场踢咗5分钟就打开纪录，老拍档苏亚雷斯亦于下半场射入12码，助乌拉圭以3比0作客击败哥伦比亚，全取3分排南美洲区第4。虽然乌拉圭全场控球率只得37%，但就以效率取胜，6射4中入3球，乌拉圭把握力确实犀利。事实上，乌拉圭近5场全开3球或以上，对住巴西亦唔係冇得踢。

　　巴西英超3宝有料到
　　巴西本来有徵召球星尼马，但佢因为受伤，上场斗委内瑞拉已经缺阵，今场亦唔会复出。不过，巴西阵中有大量实力派球员，前线有「英超3宝」罗拔图法明奴、李察利臣及加比尔捷西斯，上场亦凭法明奴一战定江山小胜委内瑞拉，呢位利物浦前锋于巴西3场世盃外入3球，尼马缺阵影响亦不大。

　　再者，巴西上场仲打起咗里昂中场卢卡斯柏基达，呢位被ＡＣ米兰放弃嘅球员，中场传出一脚靓直线畀队友，辗转畀法明奴入波，预料佢今场会抢到正选，难得有表演身价机会，卢卡斯柏基达肯定施展浑身解数助巴西赢波。巴西以往斗乌拉圭获5胜1和，心理上佔优，预料今场作客亦会照攻，同乌拉圭上演入球骚。