FC悉尼大骚有保证

今晚续有亚冠盃东亚区分组赛上演，H组澳职冠军FC悉尼于中立场卡塔尔火併中超球队上海SP（上海上港）。悉尼近年虽然雄霸澳职，但转战亚冠舞台冇乜表现，其中近6场亚冠5次开3球或以上，既然两军上届2次交锋合力炮製10个入波，今场首选2.5球入球大。

　　FC悉尼係澳职有史以来赢得常规赛（4次）及季后赛（5次）冠军次数最多球队，包括8月尾凭互射12码击败墨尔本城，成功衞冕季后赛冠军。不过佢哋转战亚冠就另一回事，虽然前线能够保持唔错入球率，可惜防线成日不设防，今届停摆前踢咗2场分组赛，分别以0比4不敌横滨水手及2比2打和全北汽车，计埋上届悉尼近6场亚冠入7球、失16球，5次开3球或以上。悉尼今次唔只有首席射手方祖被外借到印度超球队孟买城，门将列美尼亦留澳陪伴临盆嘅太太，后衞赖恩麦高云又感染新冠隔离紧，缺少呢3件主力，想突围出线都几难。

　　上届两度交锋夹埋入10粒
　　曾经闹出冇通知球员就大幅减薪嘅上海SP，喺刚结束嘅中超球季仅得第4，以佢哋嘅名气及班费投入令人失望，球队上下希望喺亚冠盃争取佳绩振奋一下。奥地利国脚阿拿奥杜域踢完国际赛，受检疫限制未能归队，肯定缺席今届赛事，巴西中场奥斯卡杜斯山度士则腿肌受伤，今仗复出机会唔大，但前锋侯克、列卡度卢比斯及澳洲中场阿伦穆尔皆可候命，锋力有保证。两军上届分组赛2次交锋，分别踢成2比2及3比3，今场好大机会又嚟入球骚，大盘不容错过。